سُتکگیں شهر ءِ گُڈّی بنی آدم

پہ کئ اوست ءَ زندگ ءِ باریں ؟

کئی شوھاز ءَ تئی چمّ راہ ءَ انت؟

راز چی اِنت تئی نندگ ءِ باریں ؟

لڈّاِتگ کُلّیں ھلک ءُ بازاراں

دیم پہ بے نامیں منزلے رپت اَنـت

دور سریں راہ ءِ دیرگیں ھمراہ

بے پدیں پگرانی پَد ءَ کپ اَنت

مَھوشیں کاڑ ءُ پُلگدیں ورناہ

پُلیں سالونک ءُ ٹیٹلیں بانور

بُرتگ انت وھد ء ِ ننگرین ھار ءَ

جی ھلو سید ءُ آسک ءُ گَڈّ ءُ گور

تو تنے وھدی نشتگ ءُ چار ئے

پرُشتگیں بان ءُ شنگیں باد گیراں

گیر ترا کاینـت رپتگیں نوبت

گورگیں کُلّ گوں شاگیں منگیراں

دور چہ زِربار ءِ دوچیں پندول ءَ

لُڈّاں لُڈّان ءَ ماہ سر کشتگ

چو جنوزام ءِ گریتگیں چمّاں

زندمان سوگی مَرگ پُرسیگ اِنت....