تہنا سر گِر پدا بِہ رَس تہنا

اینکدر ھَم مَہ بات کس تہنا

باریں کۓ چَہ نْیام ءَ پاد اتکگ

دیم پہ دیم اَنت پدا دو کس تہنا

مُرگ ءُ موسم شُتاں نَہ باں واتر

دْرچک اود ءَ اِد ءَ کبس تہنا

تو گوں ساہ ءَ منی روۓ کاۓ

نُوں وَ کشّگ نَہ بیت نپس تہنا

وھد آدینک ءِ مُجاں کور کُتگ

ھوری ءَ نِشتگ چُنت کس تہنا

سی اِتنت ماہ ءُ روچ ھَم پہ تو

من نَہ باھینت ءَ واک ءُ وس تہنا

کس نَہ بیت اِنت تو پہ من ءَ کاۓ

شالا اَنچو بِہ باتاں بس تہنا

مُرتگیں مولمانی کبر ءِ سرا

نِشتگ نازینک جنت حَوس تہنا

تو کہ اندیم بۓ ھتم وَ کئیت

گِیمُریت دیدگانی جَس تہنا

کِشک کُلّیں کُت اَنت من مُندریک ءَ

گار کُرتگ وتی من ڈَس تہنا

ایوکی ھَم مُنیرؔ ءَ میم نَہ کنت

اَنچو تہنا یاں پہ تو بس تہنا