شہر ءِ چمّ ءِ تہا گنوک کتہ

تو اوں مارا کُجا گنوک کتہ

عشق ءِ وئیل ءَ وتارا رکّھینتہ
مارا دانائی ءَ گنوک کتہ

روچے چیزے پُلیت ءُ بارت چِدا
زندگی ءَ وتا گنوک کتہ

زاہر ءَ مردم ءِ وڑائیں،تو
مارا مئے اندر ءَ گنوک کتہ

بیا بچار ھوش ءُ سرپدیں دنیا
تئی اے دیوانگ ءَ گنوک کتہ

تو وَ نئیل ئے کسے گنوک بہ بیت
تو وتا مئے وڑا گنوک کتہ

دُرسیں شِیوار نشتگنت کئے زانت
کہ کئیارا کئیا گنوک کتہ

مردمے بیت گلابے یا گواتے
ہرچی دیستہ چیا گنوک کتہ

تو کہ ھاموش نشتگئے دنیا
تئی اے بیوانکی ءَ گنوک کتہ

آس آپ ءِ تہا تو روک نہ کت
آس آپ ءِ تہا گنوک کتہ

کلّیں داناھاں پجّہ کاریں ما
ما وتا سد بر ءَ گنوک کتہ

اچ تو پد ھچ نبوتگ اَت گوں ما
کار نیست اَت وتا گنوک کتہ

ما پہ یک دومی ءَ نہ بوتیں بد
تو منا ، من ترا گنوک کتہ

ایوکی چُنت سنگر ءَ بہ بلیت
یک چراگے شپ ءَ گنوک کتہ

گِند امروز ءِ سِنچ ءِ لئیبو ءَ
تئی دیوانگ پدا گنوک کتہ

کسّے تئی آھگ ءَ چہ سُدّ ءَ رَوت
کسّے تئی رپتن ءَ گنوک کتہ

ما دیوانگ منیر تئی درد ءِ
درد ءَ تئی ہر دوا گنوک کتہ