دوچ، دوچ جامگاں زرین
درامداں پہ کُنڈ ءُ مُھریاں بدوچ
شپ داں روچ، دوچ دوچ
مچار زر ءُ مُز ءُ ماجباں کدی
پہ زانتکار دوچ موسمی ءُ مولمی
درامداں پہ جامگاں پہ جورے وشنیتکاں دوچ
شپ تا روچ دوچ،دوچ
(کریم دشتی)
راجی جھدانی اندر ءَ ھرکس وتی نکان ءَ دنت، شائر وتی وڑ ءَ ، گوشندہ، تامرکار، آزمانکار، نبشتہ کار، سرمچار۔۔۔ ھریکے وتی وتی میدان ءَ جھد کنت۔ بلے اے اولی بر اِنت کہ شیرزال ھانی بلوچ ءَ اے جھد بُرتگ ءُ دوچگراں سر کتگ کہ باید اِنت دوچگر ھم اے زلم ءُ ناروائی ءِ ھلاپ ءَ وتی ازم ءَ پیش بدار اَنت،
شیرزال ھانی بلوچ ءَ کہ ھمے جامگ ءِ سر ءَ اے ندارگ کشّی کہ کتگ باز جْوانیں ندارگ کشّی یے، ءُ بلوچ ءِ سر ءَ زلم ءُ زورے کہ بیگ ءَ اِنت، ھمے کلیں ندارگ، ھمے جامگ ءِ دوچانی اندر ءَ دست کپ اِیت، سید گوش اِیت کہ:
برے پہ ھانل ءَ گُلکاریں گال پِر بنداں
برے پہ راج ءَ چکنکاریں درداں درریچاں۔
ءُ اے کلیں دیمروی مئے بلوچ یکجھتی کمیٹی ءُ شیرزالانی جھد ءِ سمر اِنت کہ کلیں بلوچ وتی وتی پڑ ءَ جھد ءَ کوپگ دیگ ءَ اَنت، راجی جھدانی اندر ءَ اے المی اِنت کہ کلیں راج وتی نکاناں وتی وڑ ءَ بدنت ءُ باید اِنت کہ اے دوچگرانی اے دوچانی نام راجی دوچ ایر کنگ بہ بیت ءُ ایدگہ شیرزالیں زالاں ھمے سکین دیگ بہ بیت کہ بلوچ ءِ سر ءَ زلم ءُ زوراکی کہ بیگ ءَ اِنت، بلوچ راجی دوچگر ھم وتی نکاناں بدینت۔
اے بلاھیں آگاھی یے ءُ ھمے دوچانی نام الکاپ ءُ پُرمانائیں نام پِر کنگ بہ بنت، مروچاں لھتے دوچانی نام سک سُبک ایر کنگ بوتگ اَنت، چوش کہ:
پلانی ءِ شلوار، پلانی ءِ چادر، پلانی ءِ دزمال، پلانی ءِ رومال۔۔۔
اے کِرمزیں دوچانی کم شرپی اِنت۔ ھو اے رنگیں سبکیں نام مئے کرمزیں دوچانی کم شرپی اِنت، پیسر ءَ اے دوچانی جْوان جْوانیں نام ایر کنگ بوتگ۔
بلوچ شیرزال باید اِنت کہ اے پڑ ءَ ھم دلگوش ءَ گْور بکن اَنت، وتی راجی دوچاں شرپدار بکن اَنت، مروچاں ڈنی ملکانی دری راج ھم بلوچ راجی دوچ ءَ دوست دار اَنت ءُ مروچاں بازیں درکومی زالبول ھم بلوچی دوچانی پوشاکاں پِر کن اَنت۔
بلے شیرزال ھانی ءَ وتی کہ ازم ءِ کہ درانگازی کتگ، بے درور اِنت۔ اے دابیں کارست ماں راجدپتر ءَ نکش بنت، سید گْوش اِیت:
ھانل ءِ ھاتر ءَ سید انگت
گرانتریں گم وتی سر ءَ زیراں
تپاکی آجوئی ءِ مانزمان اِنت۔
بلوچستان آجو بات۔
نوخیں تبصرہ ھوار کن