بلوچی دَرونت(سبق) 4 : *آں،آن، اں، ہ ءُ ھ*

ما اول گِرانیں لبزانی بزانتاں وان ایں

گالرِد: Sentence

بُنگیج: Start

گُڈسر: Last

ھورت چاری: غور سے

رَد:Wrong

نبشتہ رھبند: Rule of Writting

گالوار: لہجہ Dialect

کارمرز: use , استمعال

دربری : Learning Course

آں: وھدے کہ(جب) گالرِد ءِ بُنگیج ءَ "من" بئیت گُڑا "آں" کارمرز بیت، بزانکہ "من" ءِ کُمکّارگال اِنت، انچوشکہ(ا۔ک۔)👇

دروری گالرِد(Example Sentences)

1- من رو آں، من بلوچی دربری یے وان آں ءُ من بلوچے آں۔

2- من بلوچی دَرونتاں وانگ ءَ آں۔

آن: وھدیکہ ما "من" ءِ گالرِد ءَ دْراج کن ایں گُڑا "آن یا ان" نبیسّگ بیت انچوشکہ

* من گِند آن ءُ شمارا ھال کن آں۔

* من وھد کش آن ءُ اے بلوچی دربری ءِ چاریں دَرونتاں سرجمی ءَ وان آں۔

وں: گپ ءُ ھبر ءَ ، بزانکہ گالوار ءِ رِد (مطابق)ءَ راست اِنت بلے نبشتہ رھبند ءِ رِد ءَ "آں" ءِ جاگہ ءَ "اوں" یا "یں یا ئیں" نبیسگ رَد اِنت۔ البت "اوں" ءِ کارمرزی جاہ دگرے۔ رھدربری گالرِد👇

1- من شُمئے کار ءَ کنگ ءَ آں۔✅

من شُمئے کار ءَ کنگ ءَ اوں❌من شُمئے کار کنیِں یا کار کنی❌

2- من تربت ءَ رو آں۔✅

من تربت ءَ روں❌ من تربت ءَ روئیں❌

3- من سجی یے ورگ ءَ ات آں۔✅

من سجی یے ورگ ءَ ات اوں❌

4- من دزگٹّ ات آں۔✅

من دزگٹّ ات اوں❌

البت اے "وں" ءُ "اِت" دو دگریں چیز اَنت ا۔ک۔👇

1- دلوں ترا داتگ۔ (بزاں من دل ترا داتگ۔)

2- کاروں کت یا کار کتوں (من کار کت۔)

3- روں (بزاں من رو آں۔)

اے ھالت ءَ گالرِدانی بُنگیج ءَ "من" نبیسّگ نہ بیت ا۔ک۔ 👇

1- ورگ اِت وارت۔ (بزاں تو ورگ وارت)

2- دْروگ اِت بست یا دْروگ اِت بست ئے۔ (بزاں تو دْروگ بست)

گُڑا ھمے وڑ ءَ ماں اے وڑیں گالرِدانی بُنگیج ءَ "تو" نبیسّگ نہ بیت۔

اں: پہ باز ءَ کارمرز بیت ا۔ک۔👇

سنگتاں، کتاباں، نودربراں، پیشیاں(Cats)۔

1- من گوں وتی سنگتاں ھوار آں۔

2- من وَ نودربراں وانینگ ءَ اِت آں!

دلگوش: من گوں وتی سنگت آں ھوار آں❌ من نودربراناں وانین آں❌

اِے وڑ ءَ نبیسّگ اش رَد اِنت۔

ھ ءُ ہ: بلوچی ءَ "ھ" گالانی بُنگیج ءُ نیام ءَ کارمرز بیت ا۔ک۔👇

ھچبر، کاھچر، ھمراھداری ءُ بھارگاہ بلے "ہ" گالانی گُڈسر ءَ کارمرز بیت ا۔ک:- ھمراہ، واجہ، ھبکّہ، گُناہ ءُ پوہ

البت پہ تْرُندیں توارینک ءَ "ھ" گال ءِ گُڈسر ءَ ھم نبیسّگ بیت ا۔ک: ڈیھ، گھ ءُ دیھ۔

*ھست سرجم ءِ زمانگ*

ھما کار مرچیگیں روچ ءَ یا مرچیگیں وھد ءَ ھلاس بوتگ اَنت آیاں ھست سرجم ءِ زمانگ گْوش اَنت۔

ھِندی ءِ پجّار: چکی ہے، چُکے ہیں ءُ چکا یے۔

1- من وَ شُتگ آں۔(میں تو جا چکا ہوں)

2- تو وتی دست شُشتگ اَنت۔ مرچی ھور ءَ گْوارتگ۔ زھگ وپتگ ءُ دْرچک ئِے گُڈ اتگ۔

3- ورگ وارتگ اَنت ئِے۔ میش گار کُتگ اَنت ئِے۔

بوتہ❌، گْوارتہ❌، شُتہ❌ ءُ کُتہ❌ یا بوت ءَ❌ گْوارت ءَ❌ ءُ شُت ءَ❌

*چے، چی ءُ چہ*

چے ءُ چی: اے دوئیں یک اَنت ا۔ک۔👇

1- تو چے ءَ زھر ئے؟ شُما چے ور اِت؟

2- من چہ دْرچک ءَ کپتگ آں۔

3- آ چہ سے لمبر ءَ بے سوب بوتگ۔

رُکسار تارک بلوچ

دلگوش: بلوچی مئے راجی پجّار اِنت پمیشکا بلوچی وت بوان اِت ءُ راج ءَ ھم بوانین اِت پرچا کہ بلوچی گوں وانینگ ءَ دیمروی کنت۔