بلوچی دَرونت(سبق) 2: بلوچی بُنگیجی ءُ بلوچی آب

نامگال(Noun)، پنامگال(Pronoun)، کُمکارگال(Helping Verb)، تپورگال(Preposition) ءُ رنگ گال(Adjectives)

دلگوش: اِے تپورگال "ءِ ، ءُ، ءَ" چہ نامگال، پنامگال ءُ سرجمیں گالاں جُتا نبیسّگ بنت کہ لبز وتی بُندری دْروشم ءَ نبیسّگ بہ بنت پمیشکا باید اِنت ما اِے "ءِ ءُ ءَ" ءِ وڑیں تپورگالاں گوں شملگ(فاصلہ) ءَ نبیسّ ایں۔ انچوشکہ جھل ءَ دروری گالرِد نبشتہ اَنت👇

* تو بانُک ھانیءِ لوگءَ روگءَ ئے۔❌

* تو بانُک ھانی ءِ لوگ ءَ روگ ءَ ئے۔✅

البت تھنا پہ یکیں مانایے ءَ اے "ءُ" دو گالانی میان ءَ بے شملگ ءَ کارمرز بیت انچوشکہ پٹءُپول(Research)، کارءُبار(Business) ءُ گَڑءُمنج(Confusion)

بلوچی ءِ زگریں گال: باید اِنت ما راجی زُبان ءِ زگریں گالاں بے تام مہ کن ایں بلکیں بلوچی ءِ زگریں گالاں راستیں دْروشم نبشتہ بکن ایں انچوشکہ

دشمن❌ دُژمن✅ اُمید❌ امیت✅ آسمان❌ آزمان✅بُنیاد❌ بُنیات✅ ءُ روشنائی❌ روژنائی✅

کُمکّار گال: ایں، آں، ئے، اِت، ایت، ئِے، اِنت ءُ اَنت"

رھدربری گالرِد(طریقہ کار جُملے)👇

* ما زُبان دوستی نبشتانکاں وان ایں، من زُبان دوستی نبشتانکاں وان آں۔

* تو بلوچی دَرونتاں وان ئے۔ شُما بلوچی دَرونتاں وان اِت۔

* بانُک ھانی راجدوستی نبشتانکاں وان ایت یا ھانی راجدوستی نبشتانکاں وانگ ءَ اِنت۔

* من ءَ گْوشت ئِے ءُ ریاز ءُ لیلہ گْوش اَنت۔

کیت ءُ نئیت: اِے بُنکارگال اَنت۔

بئیت ءُ مئیت: اِے پرمانگال اَنت۔

توری دُنیا ءِ ھر زُبانے بہ بیت گالرِد ءِ تہ ءَ لبز پُشت ءُ دیم نبیسّگ نہ بنت بلکیں لبز رِد(ترتیب) ءِ سر ءَ نبیسّگ بنت انچوشکہ انگریزی ءِ درورے دے ایں👇

Drinking i am water.❌

I am drinking water.✅

ھمے وڑ ءَ بلوچی گالرِد ھم رِد ماں رِد نبیسگ بنت انچوشکہ

* تو روگ ءَ ئے سبی ءَ❌

* تو سبی ءَ روگ ءَ ئے۔✅

بلوچی آب ایش اَنت👇

ا(آ)، ب، پ، ت، ٹ، ج، چ، د، ڈ، ر، ڑ، ز، ژ، س، ش، ک، گ، ل، م۔ ن، و، ھ(ہ)، ء، ی ءُ ے۔

دلگوش بِہ بَہ اِت کہ اِے جھلی دوازدھیں آب بلوچی نہ اَنت پمیشکا باید اِنت ما ایشاں کارمرز مہ کن اِیں کہ ایشاں اَربی آب یا تازی آب گْوش اَنت انچوشکہ

"ث، خ، ح، ذ، ص، ض، ع ،غ، ط، ظ، ف ءُ ق"

ایشانی بلوچی بدل اے وڑ ءَ اَنت کہ مارا دلگوش کنگ لوٹ ایت انچوشکہ رھدربری لبز ایش اَنت👇

ث ءِ س : ساکب، سواب، ھارس ءُ وارس۔

ح ءُ خ ءِ "ھ" : مھمد ھان، ھکیم، ھیر بکش، ھالد ھُسین ءُ ھاتر ءُ ھلیل الرھمان

ذ ءِ "ز" : زاکر، زات ءُ ازاب

ع ءِ "ا"، "آ" ، "ھ" ءُ "ء" : نئیم، پئیم، شُئیب، آرپ، اندلیب، آئیشہ، ابدلگپور، ابدلسالہ، اَلی، دوُا ءُ ریایت۔

غ ءِ "گ": لوگ، کوگ، روگ ءُ ورگ۔

ف ءِ "پ": لاپ، پاروک، پیز ءُ آسپ۔

ق ءِ "ک": کاسم ھان، وکار ءُ ابدلکادر

ص ءِ "س": سابر، پیسل ءُ سادک

ض ءِ "ز" : رزا مھمد، زیگم ءُ ریاز

ط ءِ "ت": تاھر، ابدلتیپ، اِلتاپ، تارک ءُ توپیل

ظ ءِ "ز": منزور ءُ زھور ءُ زُلم۔

ڑ ءُ ڈ: گُڈ، گُڑ، لڈ، لڑ، ھڈ، اڈ دیگ(تیار کنگ)، اڑءُاڑاند، وڑ، وڈ، گُڑا ءُ لھڑ

ھ ءُ ہ: بلوچی ءَ "ھ" گالانی بُنگیج ءُ نیام ءَ کارمرز بیت انچوشکہ:- ھبکّہ(ھیران)، مھر ءُ ھمراہ بلے "ہ" گالانی گُڈسر ءَ کارمرز بیت ا۔ک :- واجہ، توبہ، جاہ ءُ پوہ

البت پہ تْرُندیں توارینک ءَ "ھ" گالانی گُڈسر ءَ ھم کارمرز بیت انچوشکہ:- ڈیھ، دیھ ءُ گھ۔

رنگ گال ءُ کُمکّارگال:

رنگ گالانی پجّار "یں ءُ ئیں" اَنت انچوشکہ(ا۔ک۔)👇

یں: جْوانیں کار، شریں نودربر، سارتیں آپ، بدیں مردم ءُ آسانیں دربری(کورس)

ھیں: اگاں گال ءِ گُڈی آب "ہ" بیت گُڑا پہ رنگ گالی ءَ "ھیں" نبیسّگ بیت ا۔ک:- پوہ: پوھیں رھشُون، ھمراہ: ھمراھیں سنگت ءُ وتواجہ: وتواجھیں راج

ئیں: وھدیکہ(جب) لبزے ءِ گُڈسر ءَ "ا، و، ی ءُ ے" بئیت گُڑا "ئیں" کارمرز بیت :- جُتا: جُتائیں کار، روژنا: روژنائیں بان(کمرہ)

وشبو: وشبوئیں پُل، دو: دوئیں دزگْوھار، سکی: سکی ئیں زال، سی: سی ئیں پس ءُ سَے: سے ئیں مُرگ۔

نی ما اِے جھلی سے ئیں گالرِداں وان ایں ءُ دلگوش کن ایں👇

1- من نوکیں گُداں گور ءَ کن آں۔

2- ما زانتکاریں راج وت ماں وت مہ مِڑ ایں۔

3- زاناں شُما روژنائیں بانے ءِ تہ ءَ نشتگ اِت؟

ایں: اِے "ما" ءِ کُمکّارگال اِنت ا۔ک۔👇🏻

1- ما رو ایں، ما نِند ایں ءُ ما بلوچ ایں۔

2- ما نوکیں نبشتانکے وانگ ءَ ایں۔

3- ما بلوچی دربری ءِ دوئیں دَرونتاں وانگ ءَ ات ایں۔

البت پہ زیت گْوست، بزانکہ پہ نہ بیتگیں کاراں اے "ایں" گوں کارگال ءَ ھوار ھم نبیسّگ بیت ا۔ک۔👇🏻

* آئی ءَ تئی کار بِہ کُتیں، تُرندیں گْوات ءَ مہ کَش اتیں، تو من ءَ ھال بداتیں۔

* تو سبی ءَ مہ شُتین ئے ءُ من گوں شما ھوار بیتین آں/ بوتین آں۔

آں ءُ اں:

آں: ھمے وڑ ءَ "آں" پہ "من" ءَ، ءُ "اں" پہ باز ءَ کارمرز بیت، دروری گالرِد (مثالی جُملے)👇🏻

1- من کَے آں؟ من وَ بلوچے آں!(میں تو ایک بلوچ ہوں!)

2- من گوں وتی دزگْوھاراں زھر آں۔

3- من بلوچی کتاباں وانگ ءَ آں ءُ من وَ نودربراں وانینگ ءَ اِت آں۔

دلگوش: "من وانی، من کار کنی یا من روئیں" ءِ نبیسّگ رَد اِنت۔

اں: پہ باز ءَ کارمرز بیت ا۔ک:- کتاباں، بُزاں، پِشیاں ءُ دزگْوھاراں

اِت: پہ "شما" ءَ : شما بلوچ اِت، زاناں شما وانگ ءَ اِت؟ شما تچگ ءَ ات اِت۔

ئے: پہ “تو" ءَ : تو بلوچے ئے۔ تو بالاچ ءِ گْوھار ئے۔ تو روگ ءَ ئے۔

بزاں اِے کُمکّارگال "آں، ایں، ئے، ئِے، اِت، ایت، اِنت ءُ اَنت" ھمے وڑ کارمرز بنت ا۔ک👇🏻

* من وان آں۔ ما وان ایں۔ تو وان ئے۔ شُما وان اِت، الی وان ایت۔ الی ءُ بالاچ دوئیں وان اَنت۔

* ھانی وانگ ءَ اِنت۔ ھانی ءُ بانڑی دوئیں وانگ ءَ اَنت۔ من وان آن ئِے۔ من گِند آن ئِے۔ پس گار کُت ئِے ءُ آپ ئِے وارت ءُ شُت، من روان ءُ گِند آن اش۔ زر نیست انت اش۔

* ورگ وارتگ اَنت ئِے، زاناں نیار ایت ئِے؟ کار ایت اش، من گْوش آن اش ءُ چارین ایت اش( بزانکہ آ بُزاں چارین ایت۔

دلگوش: ما گوں شما دزبندی کن ایں کہ مئے دوئیں بلوچی درونتاں ھورت بوان اِت ءُ ایشاں راج ءَ ھم بوانین اِت کہ بلوچی گوں وانینگ ءَ دیمروی کنت۔