سفر مُرادے بلئے مُپت ءَ رَد کپاناں من

اے ریگزار تچان اِنت ءُ دمبراناں من

جہان چو کہ پتار ءَ منا بکنت لیپگ

او زِر ملار تئی چمّاں سنگراناں من

تئی کُل ءِ راہ پمن اِینکدر وَ دور نہ اِنت

بگندے مرچی دگہ نیمگے رواناں من

تئی مہر ءُ قہر منا چے دینت کہ مرچاں

وتارا اچ وتی امبازاں پچگراناں من

زمین ءَ گوں تئی گنوک ءَ سلام ءُ دروت نہ کُت

ءُ آزمان ءَ نہ گُشتہ کہ آزماناں من

تو انوں بیائے گڈا بلکیں سُہل ءُ ترانے بیت

کہ اے دمان ءَ پہ وت کمّیں مہرواناں من

منا چہ مردماں پیسر دریگاں اِش کُرتگ

کہ تئی نگاہ ءِ ملاریں گم ءِ زباناں من

اگاں بہ لڈّ اَنت چدءَ وہد ءُ مردم ءُ موسم

مُلوریں برمشے ءِ پئیم ءَ پتو بماناں من

مبو گمیگ اگں مجلس ءَ نہ باں گندگ

تئی ایوکی ءِ چراگ ءِ تہا بلاناں من

منیر شئیر چی یے؟ بس اگں بزانت کسے

چو گُنگیں شہمے تئی سنگہاں اڑاناں من